El Consell General d’Aran destina 200.000 € per recuperar el Patrimoni Industrial.

26 10 2010

NOTÍCIA DE PREMSA (Font: Viure als Pirineus, 15 octubre 2010)

Eth Conselh Generau d’Aran a decidit recuperar eth patrimòni industriau dera Val d’Aran, en tot començar pera reforma integrau dera Mòla de Betren, qu’ei a punt de concludir, e eth sanejament dera Fabrica dera Lan de Vielha, es òbres dera quau an començat dejà. En andues intervencions, eth Conselh aurà invertit lèu 200.000 èuros.


Ja an començat es òbres dera Fabrica dera Lan.

“Era recuperacion dera Mòla de Betren a estat ua demana plan reivindicada pes vesins ath long des ans e qu’ara se hè realitat dempús d’un procès de reabilitacion arquitectonica”, segontes a explicat era cap de Cultura e Politica Lingüistica, Maria Vergés.

Era intervencion a consistit ena totau substitucion dera estructura dera cubèrta e eth renovat deth losat. S’an assolidat es murs afectadi per henerècles, qu’an agut d’èster cosudes, atau coma eth penau deth costat sud dera bastissa, qu’ère a punt d’esbauçar-se.

S’an cambiat tanben lumedans de hièstres e pòrtes, e actuaument se trabalhe en bastiment dera passarèlla – guardader, que permeterà era vision dera estructura e eth foncionament dera mòla. Tanben se restauraràn es mecanismes e se realizarà era museografia der espaci.

Eth Conselh Generau a començat a intervier ena Fabrica dera Lan, ua infraestructura d’arqueologia industriau propèra as aigües der arriu Nere (a on s’extreiguie era fòrça motritz), qu’a patit un procès de degradacion dera husta e un inici de poiriment en diuèrsi punts.

Per aguest motiu, ère de besonh sanejar tot eth paviment dera planta baisha, damb materiaus fidèls ara construccion originau, “operacion que resulte mès complèxa der abituau per hèt qu’ei convenient non botjar de lòc es maishines de cardar e filar era lana”, segontes Vergés. Tanben se harà un tractament de conservacion en totes es pòrtes e hièstres dera bastissa entà garantir-ne era durabilitat.

Advertisements

Accions

Information




%d bloggers like this: